Телефони боварии Вазири корҳои дохилии Ҷумҳурии Тоҷикистон (+992 37) 221-21-21... Хизмати Мадад бо рақами телефони 19-19-и Вазорати корҳои дохилии Ҷумҳурии Тоҷикистон

НБО “Роғун” – роҳнамои рушди устувори Тоҷикистон

239

Ба озмун 

“Дастрасӣ ба манбаъҳои муосири энергетикӣ ва рушди “энергияи сабз” омили калидии ноил шудан ба рушди устувор мебошад ва кишвари мо, ки асоси иқтидорҳои энергетикиашро соҳаи гидроэнергетика ташкил медиҳад, аз рӯи истифодаи манбаҳои тавлиди “энергияи сабз” дар ҷаҳон ҷойи шашумро ишғол менамояд”.

 Эмомалӣ Раҳмон

Дар пайвастагӣ ба сиёсати пешгирифтаи Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон зарфи 27 соли Истиқлолият аст, ки кишвари азизу маҳбуби мо -Тоҷикистони биҳиштосо ба гуруҳи даҳгонаи мамлакатҳои рӯ ба тараққиниҳода ворид шуда, аз кишвари аграрӣ-саноатӣ ба давлати саноатӣ-аграрӣ табдил гашта истодааст.
Таъмини истиқлолияти энергетикӣ ва истифодаи самарабахши нерӯи барқ яке аз ҳадафҳои хусусияти мубрамиятдори “Стратегияи миллии рушди Ҷумҳурии Тоҷикистон барои давраи то соли 2030” маҳсуб меёбад. Дар доираи татбиқи ин ҳадаф Ҳукумати Ҷумҳурии Тоҷикистон мақсад гузоштааст, ки то соли 2028 Нерӯгоҳи барқи обии “Роғун”-ро бо шумури шаш агрегат бунёд намуда, аҳолии на танҳо Тоҷикистон, балки минтақаро бо “энергияи сабз” таъмин намояд.
Дар ин росто, бо дастгирӣ ба сиёсати Пешвои муаззамамон мувофиқи супоришоти Вазири корҳои дохилии Ҷумҳурии Тоҷикистон муҳтарам Раҳимзода Рамазон Ҳамро якчанд нафар фаъолони гуруҳи ҷавонони “Авангард (Пешоҳанг)”-и ВКД ҶТ ба сайри тамошои НБО “Роғун” дар санаи 17 июли соли 2018 дидан намуданд. Аз ҷумла, ман ба сафи ин гурӯҳ шомил шуда будам, ки ин боиси ифтихори ман буд.
Бо ворид шудан ба ин Кохи пурҳашамати аср ҳаяҷони зиёдро дар худ мепарваридам. Бо дидани ин иншоот чандон ба ҳайрат омадам, ки дар тасаввуротам ин қадар бузургии ин иншоотро тамоман напазируфта будам. Бо як дидан аз он кӯҳҳое, ки сар ба фалак ниҳода буданд, ҳамроҳи дигар ҷавонон таваҷҷуҳам ба тарзи бунёд гардидани он ва чӣ гуна мушкил будани азми он пайдо гардид ва ҳар қадар ки мо вориди ин иншоот мешудем, ҳамон қадар дар худ ҳисси фахр аз Пешвои муаззам, аз миллати побарҷо ва аз меҳнати пурзаҳмати кормандони он, пайдо намудам.
Пеш аз он, ки мо ба дохили сохтмони асосии иншоот ворид шавем, аввалан ба Шуъбачаи Вазорати корҳои дохилӣ дар НБО-и “Роғун” расидем. Дар саҳни бинои мазкур кормандони Шуъбачаи мазкур моро бо эҳтиром истиқбол гирифта, ба мо тартибу қоидаҳои ворид шудан ва чӣ тавр амал намуданамонро дар дохили сохтмони асосии иншоот фаҳмонда, бо либос ва лавозимоти пешгирандаи бехатарӣ таъмин намуданд.
Сипас, мо ба нақлиёти муқарраршуда нишаста, сайрамонро ба сохтмони асосии иншооти Нерӯгоҳ оғоз намудем. Бо тай намудан аз як чанд миқёси иншоот, хатсайри мо ба маконе расид, ки ҳанӯз дар санаи 29-уми октябри соли 2016 Пешвои миллати тоҷик Эмомалӣ Раҳмон бо нақлиёти булдозер бо шуҷоату мардонагӣ ва малакаву маҳорат пеши дарёи Вахшро баста буданд ва аз соҳили чап ба соҳили рост гузашта, бо ҳамин иқдом ба кори бунёди НБО “Роғун” ҳусни оғоз бахшида буданд.
Дар ҳамин ҷой роҳбаландони масъул ба мо доир ба иқтидор, ҳашамат ва бунёди Нерӯгоҳ маълумот дода, ба мо назокатҳои сохтмони ин Кохро фаҳмониданд. Чӣ тавре ки устод Раҳимзода Рамазон Ҳамро дар эҷодиёташон доир ба масъалаи мазкур маълумотҳои зиёдеро қайд намудаанд, баръало онро мо бо як дидан эҳсос намудем ва дар вуҷудам дарк кардам. Аз ҷумла, барои намуна якчанд мисраҳоро аз шеъри устод Раҳимзода Рамазон Ҳамро, ки бо номи “Муъҷизаи аср” аст, мехоҳам манзур намоям:
Ҳама эъҷозҳо дар рӯи дунё гар яқин бошад,
Фақат як НОБ-и Роғун муъҷиза зери замин бошад.
Ҳама аъҷубаҳо бар одамӣ ангуштарӣ гар ҳаст,
Ва ин офарида-иншооти ибрат, худ нигин бошад.
Ба чашми хеш бин, дарё ниҳон дар зери кӯҳ гардад,
Нагӯйӣ чашмбандиҳои шайх аз илми дин бошад.
Агарчи кашфиёти бешумар карданд олимҳо,
Вале дар байнашон ин ҳарбнеру беҳтарин бошад.
Зи боло менамояд он фақат кӯҳ асту як дарё,
Мадон саҳле, ки зераш оламе чун мулки Чин бошад.
Ба кас тақдир агар бошад, ки гардад ошно рӯзе,
Дарунаш пурҷило гунбаз чу як чархи барин бошад.
Хати тектоник орад тоб бар нуҳ бал заминларза,
Таги кӯҳ чорсад газ баъд толори машин бошад.
Дар ҳақиқат, чӣ тавре ки боҳашаматии иншоотро дар шеърашон устод Раҳимзода Рамазон Ҳамро зикр намудаанд, НБО-и Роғун як муъҷизаест, ки дар зери замин ба таври сунъӣ бунёд гардида истодааст ва онро метавон ба гуруҳи “Ҳафт муъҷизаҳои беҳтарини дунё” ворид намуд.
Тибқи сарчашмаҳои таърихӣ сохтмони Нерӯгоҳ ҳанӯз солҳои 1930 ба нақша гирифта шуда буд. Вале корҳои омӯзишии он соли 1960 оғоз шуда, соли 1976 корҳои сохтмонӣ ташкил карда шуданд [2]. Баъд аз пош хӯрдани ИҶШС бунёди ин сохтмон қатъ карда шуд ва маҳз дар даврони мустақилияти Тоҷикистон бо ибтикори Пешвои тоҷикони рӯйи дунё Эмомалӣ Раҳмон дубора шурӯъ гардиданд.
Ҳамзамон, роҳбаладон ба мо маълумот доданд, ки ширкатҳои бузурги давлатҳои тараққиёфтаи ҷаҳон барои сохтмони ин иншоот ҳамкории худро ба роҳ монда, тамоми таҷҳизоти лозима бо сифати аъло таъмин карда шудаанд.
Мувофиқан, Ҳукумати Тоҷикистон дар доираи ҳамкориҳои бисёрҷонибаи худ ташаббус намудааст, ки дар самти маблағгузорӣ бо Бонки умумиҷаҳонӣ барои бунёди Роғун созишномаҳо ба имзо расонад ва сиёсати хориҷии худро бо ин роҳ бо созмону ташкилотҳои байналмилалӣ густариш диҳад.
Дар ин доира, Бонки умумиҷаҳонӣ коршиносони варзидаро аз Австралия, Олмон, Швейтсария, Куриёи ҷанубӣ ва Фаронса даъват намуда, онҳоро мустақар намуд, ки санҷишҳои техникӣ ва экологиро дар Нерӯгоҳи мазкур гузаронанд [3.С. 19].
Дар натиҷаи санҷишҳои коршиносон, чунин хулоса бароварда шуд, ки бунёди ва мавриди истифода қарор гирифтани Нерӯгоҳ амнтарин ва аз ҷиҳати иқтисодӣ манфиатноктарин дар минтақа ва ҷаҳон маҳсуб меёбад, ҳамчунин коршиносон ба натиҷаи тадқиқоташон кафолат додаанд, ки НБО-и “Роғун” метавонад ба кишвари мо то ҳудуди 115-120 сол хидмат намояд [4.С.21].
Тамоми корҳои сохтмониро ширкати машҳури итолиёвӣ-“Салини Импреҷило” (Salini Impregilo) таҳти роҳбарии Президенти он - Пиетро Салини ба анҷом расонида истодааст.
Ҳамзамон, роҳбаладон ба мо қайд намуданд, ки аз ширкати “Салини Импреҷило” танҳо 112 нафар ба бунёди Нерӯгоҳ ҷалб шудаанд, ки дар умум мувофиқи омор бештар аз 94%-и кормандони сохтмонро шаҳрвандони Тоҷикистон ташкил медиҳанд. Ин аз он гувоҳӣ медиҳад, ки бо роҳи бунёди ин Кохи нур вусъатнокии шуғли пурмаҳсул дар ҷумҳурӣ таъмин карда шавад.
Дар воқеъ, инсон бо дидан аз ин иншоот дар ҳайрат меафтад, ки чӣ тавр он бо ин ҳама мушкилиҳо бунёд гардида истодааст. Ин имконпазир гардид, дар он замоне ки халқи мо дар зери роҳбарии Пешвои худ Эмомалӣ Раҳмон муттаҳид гардида, бо ташаббуси ин нафар шахсияти барҷастаи ҷаҳонӣ масъалаи сохтмони Нерӯгоҳ сар зад ва он дар амалия иҷро гардида истодааст.
Як сайре, ки мо ҷавонон дар ин Кохи нур доштем, моро куллан дигар намуд. Ман тамоман руҳияи тозаеро дар худ дарёфтам. Ҷаҳонбинии ман то дараҷае фаррох гардид, ки акнун ман бо диди нав дар зиндагиам қадам гузошта истодаам. Ин як рӯз то абад ҳамчун як муддати таърихӣ дар умри ман боқӣ хоҳад монд. Ман аз ин ҳолат то он дараҷае комил шудаам, ки акнун боифтихор иброз менамоям, ки: “Мо тоҷикон як халқи бузург ҳастем ва мо метавонем ин Кохи нурро дар якҷоягӣ бунёд созем. Аз ниёгонамон мерос гирифтем ва ба наслҳои ояндагонамон ин Кохи нурро мерос мегузорем. То насли ояндаи мо донанд, ки ниёгонашон новобаста аз ҳар гуна душвориҳои вазнин тавонистаанд, ки бо роҳбарии Пешвои муаззами худ Эмомалӣ Раҳмон ин иншоотро бунёд созанд”.
Дар интиҳо, сипозгузории худро ба Вазири корҳои дохилии Ҷумҳурии Тоҷикистон муҳтарам Раҳимзода Рамазон Ҳамро, инчунин миннатдориамро ба сардори Хадамоти пешгирии ҳуқуқвайронкунӣ байни ноболиғон ва ҷавонони ВКД ҶТ Фаттозода Абдусаттор Абдуқаҳор ва кормандони Хадамоти мазкур, кормандони ВКД дар НБО-и Роғун ва роҳбаладону шахсони масъули НБО-и Роғун мерасонам.
Таманно дорам, ки ин иншооти аср бунёд шаваду рушди устувориии Тоҷикистон таъмин гардад!
Содиқов Хушбахт Насреддинович, донишҷӯйи соли чоруми ихтисоси идоракунии ҳайати гурӯҳи “а”-и факултаи идоракунии давлатии Донишкадаи идоракунии давлатии назди Президенти Ҷумҳурии Тоҷикистон, аъзои гуруҳи ҷавонони “Авангард”


Шарҳи Шумо

Security code
Азнавсози



Муҳтарам аъзои Маҷлиси миллӣ ва вакилони Маҷлиси намояндагон! Ҳамватанони азиз! Соли 2018 бо рӯйдодҳои ниҳоят муҳимму хотирмони худ барои мардуми шарифи Тоҷикистон ва давлати соҳибистиқлоли тоҷикон соли воқеан таърихӣ буд. Бисту дуюми марти соли ҷорӣ дар Рӯзи байналмилалии захираҳои об татбиқи ташаббуси чоруми ҷаҳонии мо дар соҳаи об - «Даҳсолаи байналмилалии амал «Об барои рушди устувор, солҳои 2018-2028» бо иштироки Роҳбари давлат дар Маҷмаи умумии Созмони Милали Муттаҳид расман оғоз гардид. Дар шароити тағйирёбии иқлим, ки масъалаи ҳифзи манбаъҳо ва захираҳои оби тозаи ошомиданӣ ба яке аз мушкилоти асосии мардуми сайёра табдил ёфтааст, Тоҷикистон дар ин самт ҳамчун кишвари ташаббускор ва пешсаф дар арсаи ҷаҳонӣ эътироф гардидааст. Ба кор андохтани агрегати якуми нерӯгоҳи барқи обии “Роғун”, яъне иншооти тақдирсози аср ва ояндаи дурахшони Тоҷикистон, ки ....>>>

Qonuni

© 2019 Сомонаи расмии Вазорати корҳои дохилии Ҷумҳурии Тоҷикистон.
Истифодаи маълумотҳои сомонаи расмии Вазорати корҳои дохилии Ҷумҳурии Тоҷикистон бо нишон додани суроғаи сомона http://vkd.tj иҷозат дода мешавад
Яндекс.Метрика