Иштироки Ҷураев Яъқуб зимни насб намудани Парчами Иттиҳоди Шӯравӣ дар Рейхстаг

Ҷураев Яъқуб 9-уми октябри соли 1926 дар ноҳияи Панҷ  чашм ба олами ҳастӣ кушодааст. Таҳсилоти миёнаро дар ноҳияи зикрнамуда гирифтааст. Соли 1944 аз тарафи Комиссариати ҳарбии  ноҳияи Панҷ ба хизмати ҳарбӣ даъват шуда, дар фронти Украина дар шаҳри Кинсберги Германия (Олмон) аз 15-уми марти соли 1945 то 9-уми июни соли 1945 дар муҳорибаҳо барои сарнагун намудани фашизми истилогар ҷонбозиҳо намудааст.

Пас аз шикасти Олмон то  9-уми майи соли 1945 дар ҳайати фронти Забайкале ширкат варзида, дар муҳорибаҳои ҷангӣ дар ин ду фронт ба ҳайси минамётчик ва кашшоф (разведчик) фаъолият намудааст.

Барои корнамоиҳояш дар Ҷанги Бузурги Ватанӣ бо медали «Ғалаба бар Германия» «Ғалаба бар Япония», барои гирифтани «Кинсберг», «Разведчики беҳтарин», «Минамётчики беҳтарин» сарфароз гардидааст.

Яъқуб  Ҷураев аз соли 1944 то соли 1950 дар Ҷанги Бузурги Ватанӣ иштирок намуда, барои ба даст овардани музафаррият корнамоиҳо нишон додааст.

Чӣ тавре, ки худи Ҷураев Яъқуб ба мо иброз дошт, шаҳди Ғалабаро дар худи шаҳри Берлин чашида, рӯзи гирифтани парчами Германияи фашистӣ ва насб намудани Парчами Иттиҳоди Шӯравӣ дар Рейхстаг иштирок намудааст.

Ин лаҳзаҳои таърихӣ на танҳо барои иштирокчиёни ҷанг, балки барои тамоми мардуми азияткашидаи Иттиҳоди Шӯравӣ, ки фарорасии Ғалабаро бо тамоми ҳастӣ интизорӣ мекашиданд, фаромӯшнашаванда ва риққатовар буд. Ҳама, шиносу ношинос, ёру рафиқ ва ҳамяроқу ҳамнабард бо фарорасии Ғалаба ва анҷоми ҷанги мудҳиш ҳамдигарро муборакбод намуда, мебӯсиданд ва ашки шодӣ аз чашмони хурду калон ва пиру ҷавон ҷорӣ мешуд. Чӣ лаҳзаҳое… ин лаҳзаҳоро ҳатто тасвир кардан имконнопазир аст. Ҳазорон модарони чашминтизор, занони бевамонда, фарзандони ятим ин лаҳзаҳоро интизор буданд, ки шояд бо фаро расидани Ғалаба писараш, шавҳараш ва ё падараш аз ҷанг бармегардад. Вале, ҳайҳот, миллионҳо ҷанговарони шаҳид ба ин Рӯзи фараҳбахш нарасиданд ва миллионҳо доғ, ормон ва ҳасрат дар синаҳо боқӣ монд.

Хушбахтӣ ба кам нафароне насиб гардид, ки наздикони худро, он ҳам бошад, маъюбу ярадор қабул намоянд.     

Баъди Ҷанги Бузурги Ватанӣ Яъқуб Ҷураев низ бо захму ҷароҳатҳо ба Ватан баргашта, аз соли 1950 то соли 1980 дар мақомоти корҳои дохилии Ҷумҳурии Тоҷикистон дар вазифаҳои гуногуни ҳайати қаторӣ ва миёнаи роҳбарикунанда дар ШКД ноҳияи Панҷ фаъолият намуда, бар зидди ҷинояткорӣ муборизаи беамон бурдааст.

Ин марди накӯном дар қатори ҳазорон нафар ҳомиёни Ватан бар зидди фашизми истилогар ва бераҳму бетараҳҳум ҷони худро сипар намудааст, то имрӯзиён ҳаёти озоду хушбахтона ва орому осуда дошта бошанд.

Мо – насли ҷавон аз қаҳрамонӣ ва корнамоиҳои ин ҷавонмардони далеру шуҷоъ ва фарзандони фарзонаи халқи тоҷик ифтихор намуда, ба онҳо сари таъзим фуруд меорем.    

Раҳмонов Ғолибҷон, донишҷӯи факултети журналистикаи ДМТ.