Сафаров Маҳмадулло – ҷанговари шуҷоъ

Сафаров Маҳмадулло 15-уми майи соли 1926 дар деҳаи Хонабегии ноҳияи  Муминобод, дар вилояти Хатлон таваллуд ёфтааст. Соли 1932 ба мактаби миёнаи ҳамин деҳа рафта, таҳсили ибтидоиро дар ҳамон ҷо гирифтааст. Дар замони таҳсил дар мактаб бо хониши хубу аъло ва рафтори намунавӣ аз ҳамсинфон фарқ мекард. Баъд аз хатми мактаби миёна, лаёқати донишомӯзӣ ва саъю кӯшиши ӯро дида, омӯзгорон ӯро ба Коллеҷи омӯзгории Вилояти Кӯлоб фиристоданд.

Баъди анҷоми соли аввали хониш Раёсати Комиссариати ҳарбии вилояти Кӯлоб, Маҳмадуллоро ба ноҳияи Муминобод равон кард, то тӯли 6 моҳ ӯро барои ворид шудан ба Қувваҳои Мусаллаҳ омода намоянд.

Соли 1944 ӯро ба сафи Қувваҳои Муссалаҳ даъват карда, ба воситаи роҳи оҳан ба шаҳри Самарқанд бурданд. Баъд аз 3-рӯз бо тайёрии пурра ба шаҳри Чехословакия расиданд. Дар ҳудуди Чехословакия шабро шаб ва рӯзро рӯз нагуфта бар зидди душмани башаррият, фашизми хунхор мардонавор ҷангидааст.

Дар набардҳои хунин дар наздикиҳои дарёи Элба иштирок намуда, то ба шаҳри Прага расидааст.

Дар шаҳри Москва дар майдони Сурх Сарфармондеҳи Қувваҳои Мусаллаҳи Итифоқи Советӣ (Иттиҳоди Шӯравӣ) Иосиф Виссарионович Сталин дар ҳузури ҳамаи аскарбачаҳои сурх баромад намуда, барои далериву шуҷоатмандӣ ба онҳо «Ифтихорнома» тақдим намуд.

Сипас, аз шаҳри Москва ӯро ба шаҳри Уланбатори Ҷумҳурии Сотсиалистии Муғулистон бурданд.  Муддати 3-рӯз тамоми шаҳрҳои Муғулистонро тамошо кардааст.

Ҳамин тариқ дар давоми ҷанг то ба баҳри Зард расидааст. Моҳи марти соли 1950 хизматро адо карда, ба Ватан баргашт ва то моҳи октябри соли 1977 дар мақомоти корҳои дохилӣ адои вазифа намудааст.

Зимни фаъолият аз ҷониби Вазири корҳои дохилии ҶШС Тоҷикистон бо «Ифтихорнома» сарфароз гардидааст.

Юсупов Саидмавлон, донишҷӯи факултети журналистикаи ДМТ.