Корнамоии абармардони ҷабҳаи ҷангу набард

Қаюмов Абдувалӣ санаи 30 июни соли 1924 дар қишлоқи Қизил Пилоли ноҳияи Исфараи вилояти Суғд (собиқ вилояти Ленинобод) дар оилаи деҳқони камбизоат таваллуд шудааст.

Соли 1932 ба мактаби ибтидоии деҳоти Қизил Пилол дохил шуда, соли 1936 синфи 4-умро хатм мекунад ва аз худи ҳамон сол  то соли 1942 дар колхози ба номи Берияи ноҳияи Исфара ба ҳайси колхозчӣ фаъолият менамояд.

Моҳи январи соли 1942 ба сафи Қувваҳои Муссалаҳи Армияи Шуравӣ даъват шуда дар шаҳри Калиниски ба хизмат шурӯъ менамояд. Дар полки 42-юми алоқае, ки воқеъ дар шаҳри Севастопол буд, ҳамчун телеграфист то моҳи апрели соли 1947 хизматро давом медиҳад.

Дар муҳорибаҳои Ҷанги Бузурги Ватанӣ аз соли 1942 то соли 1947 ғаюрона ҷангида дар озод намудани Россия, шаҳру деҳоти Прибалтика ва Чехословакия фаъолона иштирок менамояд. Ӯ дар давоми хизмат якчанд маротиба ярадор шуда бошад ҳам, баъди табобат гирифтан дар госпитали ҳарбӣ боз ба ҷабҳаи ҷангу набард баргаштааст.

Барои иштирок дар Ҷанги Бузурги Ватанӣ ба ордену медалҳои зерин сарфароз гардонида шудааст:

-медали «60-солагии Қувваҳои Мусаллаҳи ИҶШС»,

 -медали «25-солагии Ғалаба дар Ҷанги Бузурги Ватании солҳои 1941-1945»,

-медали «30-солагии Ғалаба дар Ҷанги Бузурги Ватании солҳои 1941-1945»,

 -медали «40-солагии Ғалаба дар Ҷанги Бузурги Ватании солҳои 1941-1945»,

-медали «50-солагии Ғалаба дар Ҷанги Бузурги Ватании солҳои 1941-1945»,

-медали «60-солагии Ғалаба дар Ҷанги Бузурги Ватании солҳои 1941-1945»,

-медали «65-солагии Ғалаба дар Ҷанги Бузурги Ватании солҳои 1941-1945»,

-медали «Жуков».

Дар вақти хизмат дар мақомоти корҳои дохилӣ бо чунин медалу нишонаи сарисинагӣ қадрдонӣ карда шудааст:

-медали «Милитсияи беҳтарин»,

-медали «50-солагии милитсияи Шӯравӣ»,

 -медали «Хизмати шоён дараҷаи-3»,        

 -медали «Хизмати шоён дараҷаи- 2»,

 -медали «Хизмати шоён дараҷаи- 1»,

 -медали «Қаҳрамони меҳнат»,

 -медали «Барои меҳнати шоён бахшида ба 100-солагии В.И.Ленин».

Ин ҷанговари матинирода баъди баргаштан аз ҷанг соли 1947 ба зодгоҳи худ омада, дар колхоз ҳамчун колхозчӣ ба кор шурӯъ менамояд.

Чӣ тавре, ки дар сӯҳбат ин пири рӯзгордида ба мо қисса кард, аз моҳи июни соли 1951 ба мақомоти корҳои дохилӣ ба  фаъолият оғоз намуда, зиёда аз 31-соли пурсамари худро дар роҳи хизмат ба халқу Ватан сарф намудааст.

Мавсуф фаъолияти хизматии худро аз вазифаи милитсионери ШКД-и шаҳри  Исфара оғоз намуда, то санаи 1 апрели соли 1982 дар вазифаи командири Хадамоти давлатии «Муҳофиза»-и ШКД-и шаҳри Исфара хизмат намуда, аз ҳамон ҷо ба нафақа мебарояд.

Дар вақти хизмат дар мақомоти корҳои дохилӣ аз ҷониби роҳбарияти ВКД Иттиҳоди Шӯравӣ, ВКД Ҷумҳурии Тоҷикистон, РВКД дар вилояти Суғд ва ШВКД дар шаҳри Исфара зиёда аз 15 маротиба қадрдонӣ карда шудааст.

Моҳи декабри соли 1966 ба шаҳрванд Абдулаҳатова Сокина ақди никоҳ мебандад. Ҳоло Қаюмов Абдувалӣ соҳиби 3 фарзанд ва 15 набера мебошад.

Баъди ба нафақа баромадан собиқадори Ҷанги Бузурги Ватанӣ ва собиқадори Вазорати корҳои дохилии Ҷумҳурии Тоҷикистон Қаюмов Абдувалӣ бо кормандони мақомоти корҳои дохилии шаҳру вилоят ҳамкории доимӣ дошта, ҳамчун собиқадори пуртаҷриба дар тарбияи насли имрӯзаи милитсияи тоҷик ва роҳнамоӣ намудани онҳо фаъолона ширкат меварзад.  

Бешак рӯзгор ва кору пайкори ин марди наҷиб ифтихори насли навин ва ояндасози ҷомеа мебошад!

Юсупов Саидмавлон, таҷрибаомӯзи факултети журналистикаи ДМТ.