Чорабинии фарҳангии «Ҳамешабаҳор»

Чорабиниро муовини аввали сардори Академияи ВКД полковники милитсия Абдусаттор Шоев ҳусни оғоз бахшида, афзуд, ки дар Паёми имсолаи хеш Президенти кишвар, Ҷаноби Олӣ мӯҳтарам Эмомалӣ Раҳмон  қайд гардидааст, ки ҷомеаи солим аз оила ва насли солим ташаккул меёбад. Масъалаҳои маърифати оиладорӣ, баланд бардоштани масъулияти волидайн дар таълиму тарбияи фарзанд, омода кардани фарзандон ба ҳаёти мустақилона ва пойдории оила аз ҷумлаи масъалаҳое мебошанд, ки диққати доимии мақомоти давлатӣ, муассисаҳои таҳсилотӣ ва кулли аъзои ҷомеаро тақозо мекунад.

Дар  навбати худ шоири шинохта Хайрандеш низ дар мавзӯи танзими муносибатҳои оилавӣ ва баланд бардоштани маърифати оиладорӣ фикру мулоҳизаронӣ намуда, вобаста ба ин мавзӯъ аз ашъори худ шеърҳо қироат кард.

Бояд қайд намуд, ки шоир Хайрандеш умри пурбаракати худро сарфи тарғибу ташвиқи сухани баланду ноби тоҷикӣ карда, бо эҷоди дилангез ва тоҷиконаи худ дар байни мардум маҳбубияти хоса пайдо намудааст. Ашъори ӯ паҳлӯҳои гуногуни зиндагонии мардуми тоҷикро дарбар гирифта, инъикосгари пешрафт ва мушкилоти ҳаррӯзаи он мебошад.

Дар идомаи чорабинӣ овозхони шинохтаи тоҷик Қурбоналӣ Раҳмонов баромад намуда, иброз дошт, ки баргузории чунин маҳфилҳои эҷодӣ сатҳи маданӣ ва фарҳангии ҳайати шахсии мақомоти корҳои дохилиро боз ҳам баланд бардошта, фарҳангпарвар будани халқи тоҷикро нишон медиҳад. Сипас мувофиқи талаби иштирокчиёни чорабинӣ устод Қурбоналӣ Раҳмонов якчанд суруди дилнавози худро пешкаши ҳозирин намуд.   

Чорабинии фарҳангӣ хеле дилчаспу гуворо ва хотирмон баргузор гардид.

Солиҳов Х.М.