Озмуни шоҳномахонӣ байни хонандагон дар Исфара

Рӯзи 5-уми ноябр дар доираи чорабиниҳо бахшида ба Рӯзи қабули Конститутсияи Ҷумҳурии Тоҷикистон ва Рӯзи милитсияи тоҷик бо ибтикори роҳбарияти ШВКД-2 дар шаҳри Исфара байни хонандагони мактабҳои таҳсилоти миёнаи умӯмии минтақаи маъмурӣ озмуни Шоҳномахонӣ баргузор гардид. Маҳфили Шоҳномахонӣ миёни толибилмони мактабҳо аз ҷамоатҳои деҳоти Чоркӯҳ, Сурх ва Ворух дар Маркази ҷавонони ҷамоати деҳоти Чоркӯҳ гузаронида шуд.

Илова бар ин, хонандагони муассисаҳои таълимӣ аз рӯи достонҳои Шоҳнома саҳнаҳои тарбиявиро ба намоиш гузоштанд.
Чорабинии фарҳангӣ бо мақсади таҳкими нерӯи зеҳнии наврасон, бедор намудани ҳисси ватандӯстию хештаншиносӣ, ҷалби онҳо ба мутолиаи асарҳои бадеӣ, сайқали маҳорати суханварӣ ва огоҳи ёфтан аз адабиёти пурғановати ниёгон ташкил карда шуда, ҳадафи дигар пешгирӣ аз беҳудагардии наврасон унвон карда шуд. Дастандаркорон ба пурдонӣ, зиёд аз бар намудани байту асарҳои Шоҳнома, дарки маънӣ, тафсири байт, қироати ифоданоку хушбаёнии иштирокчиён баҳо доданд.
Озмуни Шоҳномахонӣ бо иштироки 280 нафар хонандагони мактаб ҷараён гирифта дастаи толибилмони МТМУ №25-и ҷамоати деҳоти Чоркӯҳ ҷойи аввал, МТМУ №58 зинаи дуюм ва хонандгони МТМУ №65 мақоми сеюмро сазовор шуданд.
Муовини сардори ШВКД-2 дар шаҳри Исфара подполковники милитсия Солеҳҷон Парпиев ба ғолибон сипоснома ва туҳфаҳо тақдим намуда, бори дигар онҳоро ба донишандӯзӣ, аз ҷумла мутолиаи асарҳои бадеӣ ҳидоят намуд.

Иқдоми кормандони мақомоти корҳои дохилӣ аз ҷониби омӯзгорон, волидайну сокинони минтақа хуш пазируфта шуд ва онро дар тарғиби тарзи ҳаёти солим миёни насли наврас муфид хонданд.

Акбар Шарифӣ, майори милитсия