Модар, фариштатинати ман, меҳрубони ман!

Модар, фариштатинати ман, меҳрубони ман,

Оҳанги сад умеди ману достони ман.

Меҳрубон
Модар - баҳор мисли ту зебо аст,
Ҳарчанд меҳрбориву яктоӣ.
Ман аз сафои ҳусни ту менозам,
Ҷонам ҳалоки ин ҳама зебоӣ.

Он сабзае, ки сар бикашад ором,
Бар миҷаҳои чашми ту мемонад.
Ҳам булбуле ба шохи гуле бо завқ,
Афсонаҳои ишқи ту мехонад.

Дар осмони рушани бахти ман,
Аз хандаи лабони ту хуршед аст.
Оғӯши гарму нарми туро хоҳам,
Зеро, ки ошёнаи умед аст.

Модар баҳор бӯи туро дорад,
Ҷонам ҳавои кӯи туро дорад.
Дил роҳат аз нумӯи ту меҷӯяд,
Чашмам хумори рӯи туро дорад.

Модар
Модар, маро дар оғӯши гармат панаҳ бикун,
К-аз сахтии ҷаҳони фиребо шикастаам.
Пирам чу мӯйҳои сафеди ба ғам тарат,
Чун мардумони чашми намат ғусабастаам.

Дар бенавоиҳои шаби ҳасратам ба субҳ,
Ёди садои аллаи ту зинда дорадам.
Дастам бигиру дар дили танҳоиям намон,
К-оҳанги синасӯз ба ҳолам гузорадам.

Гарчи миёни ранҷи ману мо нишастаем,
Бо лутфи худ намой заволаш, ки доварӣ.
Оёти покии нафасам аз дуои туст,
Андешапарвариву азизиву дигарӣ.

Қурбони меҳри роҳнамоят, азизи ман,
Хуршеди бар сарам, ки маро хандаат бас аст.
Он охирин нафас, ки сари ҳар дуои туст,
Баҳри мани фитода ба поят муқаддас аст.

Офоқ Қодириён