Тамошои дастаҷамъонаи филми бадеӣ дар кинотеатри «Зебиниссо»

Тамошои барномаҳои театрикунонида ва кинову филмҳои хусусияти тарбиявидошта ба шахс руҳу илҳоми тоза бахшида, ҷаҳони маърифат ва фарҳангу маданияти ҷавононро ғанӣ мегардонад.
Бо дарки ин мафҳум бо ташаббуси Хадамоти пешгирии ҳуқуқвайронкунӣ байни ноболиғон ва ҷавонони ВКД, ҳафтаи сипаришуда ҷавонони фаъоли гурӯҳи «Авангард» ва 150 нафар хонандагони муассисаҳои таҳсилоти миёнаи умумии ҳудуди пойтахт ба кинотеатри «Зебиниссо» барои тамошои филми бадеӣ ҷалб гардида, ба таври дастаҷамъона ба тамошо омаданд.
Филмномае, ки аз ҷониби ҳунармандони кинои тоҷик таҳти унвони «Кин» пешкаши тамошобинон карда шуд, саропо панду ҳикмат буда, ҷавононро ба ватандӯстиву меҳанпарастӣ, ҳурмату эҳтироми падару модар ва муносибати хуб бо атрофиён даъват менамуд. Хонандагон ва ҷавонони фаъол бо рӯҳи болида ба филми мазкур таваҷҷуҳ намуда, аз тамошои он як ҷаҳон маънӣ бардоштанд.
Чунин тасмими роҳбарияти Вазорати корҳои дохилиро аъзоёни гурӯҳи «Авангард» ва хонандагони муассисаҳои таълимӣ дар шаҳри Душанбе хуб пазируфта, изҳор доштанд, ки чунин ташаббусҳо бештар ба роҳ монда шавад, то ҷавонон дар баробари бо якдигар аз наздик ошно гардидан, сатҳи маърифат ва фарҳангу маданияти хешро боло бардоранд.
Дилшод Холов, нозири гурӯҳи матбуотии
ХПҲНҶ ВКД