Намоишномаи «Кавсан» пешкаши кормандони милитсия гардид

Имрӯзҳо Ҳукумати Ҷумҳурии Тоҷикистон барои инкишофи санъати театрӣ ва ба ин восита, баланд бардоштани фарҳангу маънавиёти ҷомеа имкониятҳои васеъро фароҳам овардааст.
Театри тоҷик аз ҷиҳати гузориш ва баррасии проблемаҳои иҷтимоӣ ва ахлоқиву тарбиявӣ чун оина ба халқ хизмат намуда, баҳри иҷрои рисолати аслии хеш кӯшиш ба харҷ медиҳад. Гуфтан мумкин аст, ки нақши театр дар ҳаёти маънавии ҷомеа калон мебошад. Драматургони тоҷик имрӯз асарҳои худро дар асоси воқеаҳои рӯзгору зиндагӣ дар рӯҳияи тарбиявӣ эҷод намудаву дар баланд бардоштани сатҳи маънавии мардум нақши босазо мегузоранд.

Ба таври мисол, ҳафтаи сипаригардида дар Театри давлатии академӣ-драмавии ба номи А.Лоҳутӣ драмаи иҷтимоӣ дар мавзӯи доғи рӯз бо услуби "Тамошо андар тамошо", аз рӯи асари драматурги тоҷик Ҷумъа Қуддус пешкаши кормандони мақомоти корҳои дохилӣ гардонида шуд. Ин намоиш, ки ба "Соли ҷавонон" бахшида шуда буд, порагириву ришваситониро, ки ҷомеаи моро ба ташвиш овардааст, фаро гирифт. Драма характери иҷтимоӣ дошта, бо номи "Кавсан" ба тамошобинон пешниҳод карда шуд. Дар он ҳунармандони ҷавон маҳорати худро нишон дода, аз замони Пётри I ва шоҳ Комбиз дар қиёс ба имрӯзи ҷомеа мисолҳо оварда шуд, ки чӣ гуна бо порагирӣ ва ришваситонӣ мубориза мебурданд.
Боиси зикр аст, ки пас аз тамошои чунин намоишномаҳо тамошобин ба саволҳои худ посух ёфта, нигоҳ ва тафаккури худро тағйир ва рушд медиҳад.
Наврӯз ҶОБИРОВ, София ШОИКОВА