ТАБРИКОТ

Бояд гуфт, ки пешрафту шукуфоии Тоҷикистони азиз пеш аз ҳама ба сиёсати созандаву бунёдкоронаи Президенти мамлакат ва фаъолияти шабонарӯзии хизматчиёни мақомоти ҳифзи ҳуқуқ, хусусан кормандони мақомоти корҳои дохилӣ марбут аст. Аз ин рӯ, дар чорабиниҳои ҷашнии сатҳи гуногуне, ки дар соли 2012 дар саросари кишвар гузаронида шуданд, кормандони милитсия ҳангоми баргузории онҳо баҳри таъмини тартиботи ҷамъиятӣ, ҳифзи амнияти шаҳрвандон ва меҳмонон-иштирокдорони ин чорабиниҳо хизмати арзанда намуданд. Ҳамин аст, ки дар маҷлису ҷамъомадҳои ҳукуматӣ, ки бо иштироки Сардори давлат баргузор гардиданд, Президенти ҷумҳурӣ Ҷаноби Олӣ мӯҳтарам Эмомалӣ Раҳмон ба фаъолияти назарраси кормандони мақомоти ҳифзи ҳуқуқу тартибот дар ҷараёни гузаронидани чорабиниҳои тантанавӣ баҳои баланд дод. Ин баҳои додаи Роҳбари давлат мову шумо, ҳомиёни ҳуқуқу тартиботро вазифадор мекунад, ки дар фаъолияти фаврӣ-хизматӣ натиҷаҳои боз ҳам беҳтар ба даст оварда, аз ин ҳам бештар боварии халқу давлатро сазовор гардем.

Роҳбарият ва ҳайати шахсии мақомоти корҳои дохилӣ барои тинҷу ором ва дар фазои идона гузаштани чорабиниҳое, ки дар Соли нави 2013 баргузор мегарданд, аз имрӯз омодагӣ мебинанд. Боварӣ дорем, ки рӯйдодҳое, ки дар соли оянда дар шаҳру ноҳияҳои Тоҷикистони азиз баргузор мегарданд, чун ҷашну маросимҳои соли 2012 дар хотири мардум то дер нақш мебанданд.

Бо ҳамин орзуҳои нек кормандони мақомоти корҳои дохилӣ, собиқадорони милитсия, наздикону пайвандони онҳо ва тамоми мардуми сарбаланди тоҷикро бо фарорасии соли 2013 аз самими дил муборакбод гуфта, ба онҳо дар Соли нави мелодӣ рӯзгору тинҷу ором ва дастархони пур аз нозу неъматро таманно мекунам. Бигзор Соли нав бо қадами хуҷастааш кошонаҳои ҳар яки моро нуру зиё бахшад.

Иди Соли нав муборак, ҳамкасбони азиз!