Маҳфили бошукӯҳи идона дар ноҳияи Рӯдакӣ

Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон мӯҳтарам Эмомалӣ Раҳмон дар Паёми навбатиашон ба Маҷлиси Олии мамлакат дар баробари дигар самтҳо, ба масъалаи ҷавонон низ дахл намуда, чунин изҳор доштанд:
«Ғамхории Ҳукумат нисбат ба ҷавонон танҳо бо соли ҷавонон маҳдуд намешавад. Баръакс, ҳалли масъалаҳои вобаста ба наврасону ҷавонон минбаъд низ самти муҳимтарини фаъолияти мо хоҳад буд».

Воқеан, масъалаи ҷавонон ба таълиму тарбия фаро гирифтани онҳо, инчунин муҳайё намудани шароитҳои хуби кору зиндагӣ ва таҳсил барои ин қишри фаъоли ҷомеа аз самтҳои муҳими фаъолияти Ҳукумати кишвар ба ҳисоб меравад.
Ҳамин аст, ки дар доираи ин сиёсати созанда вазорату идораҳои гуногуни давлатӣ низ ба масъалаи мазкур таваҷҷуҳи зарурӣ дода, вобаста ба ҷалби бештари ҷавонон ба ҳаёти солим ва тарғиби илму донишҳои замон миёни онҳо ҷаҳду талош менамоянд. Дар ин радиф, Вазорати корҳои дохилӣ низ аз худ ташаббус нишон дода, дар давоми соли 2017, ки аз ҷониби Пешвои миллат «Соли ҷавонон» эълон гардида буд, чандин конфронсу семинарҳо ва чорабиниҳои гуногуни фарҳагию фароғатӣ гузаронидааст.
Бо ташаббуси Вазорати корҳои дохилӣ 9-уми феврали соли равон, дар ноҳияи Рӯдакӣ бо иштироки доираи васеи ҷавонони фаъоли кишвар чунин як чорабинии бошукӯҳ баргузор гардид. Дар навбати аввал, гурӯҳи ҷавонони фаъол бо роҳбаладии масъулину намоянадгони Ҳукумати ноҳияи Рӯдакӣ, Вазорати корҳои дохилӣ ва дигар мақомоти дахлдор гулбоғи «Баҳорнистон»ро тамошо намуда, аз осорхони таърихӣ-кишваршиносии ба номи Абдукарими Қурбон, ки бозгӯи таърихи қадимӣ доштани ин ноҳияи калонтарини ҷумҳурӣ мебошад, боздид ба амал оварданд.
Сипас намояндагони ҷавонони кишвар ва аъзои «Авангард», аз намоишгоҳи ҳунарҳои мардумӣ ва китобу мусаввараҳои ҷолиб, ки ба муносибати эълон гардидани соли 2018 ҳамчун «Соли рушди сайёҳӣ ва ҳунарҳои мардумӣ» дар ноҳияи Рӯдакӣ доир гардид, дидан намуданд.

Дар идомаи чорабинии фарҳангӣ-фароғатӣ, дар Қасри фарҳанги ноҳияи мазкур ҷамъомади бошукӯх баргузор гардид. Маҳфили идонаро муовини раиси ноҳияи Рӯдакӣ Фирӯза Камолзода бо сухани ифтитоҳӣ ҳусни оғоз бахшида, аз тадбирҳои андешидаи Ҳукумати Ҷумҳурии Тоҷикистон дар самти ҷавонон ёдовар шуд. Мавсуф зимни баромадаш ташаббусҳои дигар мақомоту идораҳои давлатӣ, хусусан иқдоми ибтикороти навбатиии Вазорати корҳои дохилиро дар масъалаи дастгирии ҷавонон шоистаи таҳсин номида, изҳор дошт, ки дар самти тарғиби ҳаёти солим миёни ноболиғону ҷавонон мақомоти корҳои дохилӣ бо Мақомоти иҷроияи ҳокимияти давлатии маҳаллӣ, алахусус бо Ҳукумати ноҳияи Рӯдакӣ ҳамкории наздик дошта, вобаста ба ин мавзӯи рӯзмарра чандин чорабиниҳои муштарак гузарониданд, ки маҳфили имрӯза далели ин гуфтаҳо мебошад.
Дар идомаи ҷамъомад инчунин раиси шӯрои кӯҳансолони Ҳаракати ваҳдати миллӣ ва эҳёи Тоҷикистон Ғайбулло Афзалов, сардори Хадамоти пешгирии ҳуқуқвайронкунӣ байни ноболиғон ва ҷавонони Вазорати корҳои дохилӣ полковники милитсия Фаттозода Абдусаттор Абдуқаҳҳор, намоянадагони як қатор ташкилоту идораҳо ва ҷавонони фаъол баромад намуда, аз дастгириҳои рӯзафзуни Ҳукумати мамлакат нисбати ҷавонон ёдовар шуда, зикр намуданд, ки маҳз натиҷаи ҳамин гуна ғамхориҳои давлат аст, ки таи солҳои охир хонандагону донишҷӯёни тоҷик дар бисёре аз озмуну олимпиадаҳои байналмилалӣ ҷойҳои намоёнро ишғол намуда, дар мусобиқаҳои сатҳи гуногун соҳиби мақоми баланд гардиданд.

Аз ҷумла, варзишгарони моҳири кишвар, ки ҷавонон ба ҳисоб мераванд, дар ин гуна чорабиниҳои варзишии ҷаҳонӣ борҳо парчами ҷумҳурии соҳибистиқлоламонро дар арсаи байналмилалӣ баланд бардоштаанд.
Дар ҷараёни чорабинии бошукӯҳ ба раиси ноҳияи Рӯдакӣ Муҳаммадраҳим Юсуфӣ аз номи Вазири корҳои дохилӣ генерал-полковники милитсия Раҳимзода Рамазон Ҳамро «Сипоснома»-и Вазорати корҳои дохилӣ супорида шуда, ҳамчунин чанде аз ҷавонони фаъоли кишвар низ бо Сипосномаву Раҳматнома ва Ифтихорномаву дигар туҳфаҳои таъсисдодаи Вазорати корҳои дохилӣ қадрдонӣ карда шуданд.
Барномаи консертии ҳунармандони санъати тоҷик анҷомбахши ин маҳфили идона гардид.
Абдулло Шоев, нозири калони гурӯхи матбуотии
ХПҲНҶ ВКД.